Daily Archives: April 14, 2012

14Apr
LivingRoom-Basma1-1

Renovating an Apartment Living Room – تجديد صالون في شقة

تواصلت معاي الأخت الكريمة بسمة بعد ما قرت موضوع غرفة المعيشة اللي عملتها لخولة، وأشكر لها هالتواصل و أعتذر لها عن التأخير بالتصميم .. حبت بسمة نجدد في صالون شقتها و بعد ما راسلتني بصور المكان و مساحته و وضحت لي الألوان والستايل اللي تحبه، صممته بالشكل اللي موجود بالصورة، الصراحة الخيارات كانت محدودة شوي لأن الصالون اللي راح نجدده مفتوح على صالون ثاني لونه أخضر زيتي و ستايله كلاسيكي جداً و مصدر التهوية بالشقة مشترك بينه الصالونين، أبواب الشقة بنية غامقة و أرضيتها رخامية بيج

فكرة التصميم إن الجدران تنصبغ بلون بيج مايل للصفار بشكل خفيف. و بما أن بسمة عندها أصلاً صوفتين و كرسيين، عملت التصميم بحيث نستفيد من إحدى الصوفات و ننجدها بلون ليموني مايل للأخضر مع تغيير موديلها شوية بحيث إنها تتخلص من الزوائد الموجودة في أذرع الصوفا والزينة الخشبية اللي فيها. و بدال طقم الكراسي اللي مع الصوفات، نطلب كراسي خشب بأذرع لأنها تعطي شكل رشيق في المكان وننجدها بقماش مخطط بأخضر زيتي و عنابي أساسه نفس درجة الصوفا. اخترت إن الكراسي تكون مخططة عشان ما تتنافر مع الصالون الثاني (الأخضر الزيتي الكلاسيكي) اللي قماشه مشجر

بسمة تبي تحط طاولة سفرة صغيرونة، يفضل تكون طاولة السفرة مدورة (يمكن استخدامها لاحقاً كطاولة انتريه بدون كراسي الطعام) تكون خشبيية بلون بني غامق .. الكراسي سادة بدرجة العنابي الموجود بكراسي الجلسة. اخترت الطاولة تكون بنية غامقة لأن اللون السائد في الصالون من ناحية الأبواب الخشبية هو البني الغامق، فالأفضل إننا نحتضن أكثر هاللون ونخليه يسود أكثر بالمكان لأنه لون صعب و مو سهل تجاهله .. سقف الصالون فيه مروحة بيضاء يفضل أيضاً إنها تنرش صبغ ناري بلون بني غامق عشان تعطي شكل فينتاج

طبعاً لأننا كنا مضطرين نحد من خياراتنا في الأقمشة فالبديل والعوض هو في ديكور الجدران. يعني ممكن نحط على جدار 1 لوحات ناعمة وبسيطة (كانفس بدون برواز) ولونها فاتح علشان نعمل توازن بالألوان

أو صور بدون براويز لبسمة وعائلتها بالشكل هذا

و نعلق على جدار 2 الموضح بلوحة التصميم مرايا بأحجام مختلفة ولها براويز منوعة شي عريض و شي ناعم، ذهبي و معتق و برونزي، مستطيل و بيضاوي و مربع وغيره.  هذا الجدار فيه شباك صغير لكنه ما يدخل إنارة طبيعية أو تهوية (يطل على منور) فالأفضل يتم تغطيته .. بشكل يشبه هالصورة

أما جدار 3 فأقترح على بسمة إنها تستفيد من الحردة الموجودة بالجدار و تخلي نجار يعمل لها طاولة تلفزيون خشبية بسيطة تحط عليها شاشة بلازما بحجم ما يتعدى 40 بوصة يناسب حجم المكان. ممكن ينحط فوق طاولة التلفزيون رفوف ناعمة عليها كتب أو تحف بورسلان أو زجاج ناعمة و صغيرة وملونة .. بيساعدنا بفكرة الفينتاج أو الشكل القديم

أما بالنسبة لطاولة الجلسة اللي تخدم ضيوف المكان يفضل تكون زجاجية بأرجل ذهبية

   

حاولت أخلي التصميم اللي عملته لبسمة  يجمع شوية بين الكلاسيكي والعملي .. ويكون دافي وشيك بنفس الوقت .. إن شاء الله يعجبها

TrendyFlamingo.com © Copyright 2011 - 2014, All Rights Reserved